شئ غريب جدا جدا جدا لما تلاقي مذيع في برنامج بيعمل لقاءات مع البشر ويسأل سؤال مثلا عن أي شئ مثلا لو بيسأل عن منتج معين لشركة ما فتلاقي البلاص اللي بيجاوب يقولك "دا الشعب كله بيستخدمه الشعب كله بيحبه" يا سلام وبفقر شكلك انت عرفت ازاي ان الشعب كله بيحبه أو بيستعمله هل لفيت علي الـ 70 مليون وسألتهم واحد واحد عن الشئ ده - حاجه غريبه والله
نفس القصه بتتكرر مع الأشخاص وغالبا بتبقي الفنانين المجانين فتلاقي مثلا مذيع في برنامج بيسأل الضيف عن الفنان ده أي سؤال فتلاقي الضيف بيرد "طبعا طبعا -ايه هوا اللي طبعا مش عارف- ده فنان محبوب جدا وكل الشعب والعالم العربي بيحبه وبيتفرج علي أفلامه" يا سلام يا عم الغبي وانت عرفت ازاي يعني ولولا انه عربي كان قال أوروبا كمان بتتفرج عليه - ياسلام عالغباء
دايما تلاقي الشخص ده -البلاص يعني- واخد توكيل رسمي من الـ 70 مليون بني آدم - مش هقول 70 ملوين بلاص لأن فيهم ناس كويسه اللي انا منهم يعني- وبيتكلم باسمهم لما تلاقي الشخص ده لازم تعرف انه مصري
 
أما الحاله الوحيده اللي أنا ممن أقول فيها الشعب كله بيحبه هي لو اتسألت عن اللي بالي بالك -يعني اللمبي وبالك ميروحش لبعيد- فطبعا هقول الشعب كله بيحبه وسلملي علي العقول والعقل زينة في الباترينه - وبركاتك يا زكية زكريا

السلام عليكم ورحمة الله وبركاته

  موضوعي المره يمكن يكون مستفز لفئة معينة لا داعي لاطلاق اسم عليها حتي لا اقذف بالطوب فدايما الحق يزعل كالعادة

هل حضرتك مبرمج؟ اذا كانت الاجابة بنعم فأحب أسأل حضرتك مين اللي قال انك مبرمج؟ هل أنت من اطلق هذا اللقب علي نفسك.. ولا أخدت سيرتيفيكيشن من ميكروسوفت (أو أي شركة اخري مش دي القضية) مثلا ولا اخدت شهادة جامعية في البرمجة من اي جامعة سواء مرموقه أو مش مرموقه حتي, اذا لم تكن حاصلا علي اي شئ رسمي يشهد بأنك مبرمج فمن أين جاءت لك هذه الفكرة أو حتي لو كنت حاصلا علي أي مؤهل يشهد علي انك مبرمج فهل تصدق هذا؟ هل تعتقد ان البرمجة موهبة فطرية ولا أي حد يدرس برمجة او خد (كام كورس بطريقة التزغيط) يبقي مبرمج؟ هل تعتقد انه يوجد مبرمج لا يستطيع استخدام برنامج (مش صعب)؟ هل تعتقد انه يوجد مبرمج لا يستطيع عمل بحث عن توول مثلا علي النت؟ فيؤسفني ان اقول هذا هو حال المبرمجين العرب, عايشين قمة في التوهان, وتلاقي الواحد منهم شغال في بروجيكت ماشاء الله وتتخيل بقي انه عمل اللي محدش عمله ولو شفت البرنامج الضخم اللي شغال عليه هتلاقيه عبارة عن واحد فرغ رغبة مكبوته في أن يصبح مبرمج, يا جماعه ارحمونا.. لحد امته هنفضل نعمل شوية عك ونسميها برامج ونبقي كلنا فشخره وانبساط, ارحمونا بقي.. الهنود بقيوا بيصدروا سوفت وير للعالم , واحنا مش عارفين , شركات كتير مسميه نفسها شركات برمجة وما شاء الله المبيعات شغال نار , وكل اللي فيها شوية بلاليص بيخبطوا علي الكيبورد وبيسموا نفسهم مبرمجين, والنتيجة ان قسم الدعم الفني هو أكتر قسم بيبقي شغال لأن كل خمس دقايق تلاقي عميل بيشكي ان البرنامج مره مهنج ومرة قفل لوحده ومره طلع بج أو ايرور ومره مش عارف ايه.., أنا متأكد انه اي شركة من دول لو حاولت تصدر السوفت وير ده للأجانب مش عايز أقول هيكون ايه ردهم.. شئ مخزي فعلا 

يا جماعة مش هيبقي لينا مكان في عالم البرمجة الا لما الناس تبطل تآخد البرمجة مهنة علشان الفلوس بتاعتها كتير.. والله فيه مهن كتير فلوسها كتير نصيحه لكل شبه مبرمج اعمل مراجعة لنفسك وشوف هل انت في المكان الصح ولا المهنة دي مش مهنتك وياريت لو مش مكانك البرمجة متترددش ثانية واحده ف انك تفضي مكان لغير

 كمان مرة لو معجبكش كلامي اعمل شفت ديليت وريح الجمجمة لأنه مفيش فايدة